Време за мачкање лебчиња

Нели знаете како понекогаш ни се јаде нештоооо, но да не е манџа. Понекогаш и не знаете каков сендвич да си припремите за на работа или за во школо за децата.
Од друга страна периодите „ааа, ама ја тоа не го јадам“ ми ги кинат нервите.

Затоа како алтернатива доаѓаат премазите.

Едниот е дип со ореви (од една од моите омилени страни Гответе с мен), а другиот е варијанта на Хтипити салата, ко го прави мојата пријателка Кате. Се разбира, намачкани брз домашен леб. 

Бидејки периодов ќе се заредат слави и празници, рецептите може да се искористат и за гости. 

Еве и кои рецепти користам.

Дип со ореви

Потребни продукти

300гр. безсолна урда 

150гр. тазе искршени ореви

2-3 лажици кисело млеко

малку маслиново масло, малку хималајска сол и црн бибер

Оревите се кршат на ситно. Се додават другите продукти и се промешува добро се. Може да се додаде уште малку кисело млеко ако смесата е многу густа,
Пробала суми со мелени ореви, но некако смесата испаѓа потешка.

Варијант на Хтипити салата

Потребни продукти

300гр. безсолна урда

1 зелена пиперка
1/2 зелена лута пиперка
1 чешне лук

2-3 лажици кисело млеко
малку маслиново масло, малку хималајска сол и црн бибер

Кој сака да сецка на ситно зеленчуци - да исецка пиперките и лукот. Кој како мене не сака баш да се замара со тоа , нека ги пушти на сецко. Потоа пиперките се промешуват добро со останатите продукти и готово.

Двата премази коштаат најмногу 300 денари во зависност дали имате дома печени пиперки и ореви или треба да купувате. 

Не знам за вас, но печените пиперки од тегла не ми се посебно омилени. Но сакам  Македонска салата не битно со печени или со свежи пиперки, кравјо, козјо или биено сирење.
Затоа оваа есен поминав еден ден во печење, лупење и пакување на пиперки и чистење на рерната, но вредеше.
Наскоро јадев и нешто многу  многу  вкусно со печени пиперки, што ќе споделам со вас по празниците.😀

Добар апетит!

Мафини од палента

 Децата ми побараа палента за вечера. Јас за да не биде секогаш иста класична варена палента, решив да пробам наместо проја мафини да направам палента мафини. Многу брзо ги подготвив и не згрешив. Сите се изедоа, и малку ни беа еден калап со 12 мафини. Јас ги направив вака:

Состојки:

• 3 јајца
• 350 мл. јогурт
• 120 мл. масло
• 250 гр. палента
• 150 гр. бело брашно
• 1 прашак за пециво
• сол
• 150 гр. козјо сирење
• сусам
• ленено семе

Јајцата се матат малку со метална жица (не со миксер). Се додава маслото, јогуртот, брашното, палентата, пецивото и се посолува. Се убаво се соединува. Калапот се премачкува со путер и се полни најпрво до половина. Потоа во секој дел ставаме по едно парче козјо сирење (тука може да се стави кашкавал, некој вид зеленчук - домат, брокула, варен морков, печурки..) и потоа се покрива со останатата смеса, за да се дополнат калапите. Одозгора се нарасува сусам и ленено семе (може и мелен лук, морска сол, ким, оригано...). Се печат во загреана рерна на 220°С 20 минути.

Многу се вкусни и здрави. Од состојките имав се дома. Само погледнав дали имам јогурт во фрижидер. Имав, за среќа и така убаво се нагостивме. Само следниот пат треба во поголем калап да правам:)
Исто е убаво што може и во овој рецепт да се ставаат состојки по вкус и може да се направат најразлични комбинации.
Пријатен апетит !

Вкупно: околу 100 денари

Интегрални лепиња со кромид и кашкавал

Рецептот е од тука-блогот Мед и млеко. Го имам од многу време и до сега ги правев со бело брашно.
Пробата со интегрално и некои измени испадна многу добро.

2 и 3/4 ч.ч. интегрално брашно (може и 3 чаши да дојдат)
1 с.л. кафен шеќер
2 ч.л. прашок за пециво
2 с.л. ситно исецкан стар кромид
1ч.ч. рендан кашкавал(околу 100г)
3/4 ч.ч. млеко (или малку повеќе)
1 с.л. зејтин или растопен путер
1 јајце
2 ч.л. сенф
1/2 ч.л. чубрица
сусам за нарасување + уште 1 јајце или нерастопен путер

Рерната се пушта на 220 степени да загрева. Се припрема тава обложена со пекарска хартија.

Во длабок сад се стават брашното, прашокот за пециво, шеќерот и чубрицата. Се додава и кромидот и кашкавалот и се промешува. Јајцето се мати со зејтинот, млекото и сенфот.
Се соединуват течните со сувите состојки, се мешат додека се добие меко тесто, кое се става врз набрашнета површина. Со набрашнети раце се оформуват лепиња (12-16 парчиња).
Опција 1: се мати едно јајце, питките се премачкуват со него и се нарасуват со сусам;
Опција 2: во средина на секоја питка се прави дупче со прст во кое се става сосема малку путер.
Лепињата се печат околу 20 минути или готовност. Се сервират топли.



Не знам защо на моите обично им требаат 30 минути за печење и 10 за да бидат изедени. Втората слика е тазе-тазе, дури жежки. Со бело брашно, свеж кромид, премазани со јајце и нарасени со интегрален сусам и ленено семе.

Вкупно - околу 60 денари

Бабините банички...малку поинакви

Ви текнува на старите ќумбиња на кои може да се готви? Крчкање со часови...мм, вкусно.

На овие банички не им требат часови за припрема, ама ако се повеќе гладните, тој што ги сука и ги пече направо е окапал кај ринглата :) На времето тоа беше едната ми баба. Таа ги печеше директно на ринглата. Сега како помодерни, печеме на тавче за кое не е потребен зејтин, путер... демек суво тавче. Состојките се сосема прости, но резултатот е многу вкусен. Со еден убав чај од мајчина душица и лимон... Да не претерувам, еве ги состојките:

• 1 1/2 ч.ч. вода
• 1 ч.л.сол
• 1 с.л. зејтин
• интегрално брашно колку е потребно за меко тесто ( околу 4  чаши ми беа потребни, но се додаваат по малку, не се од еднаш)

И така - се меси меко тесто од кое се земаат топчиња колку мало киви ( да речеме), се сука тенка кора со помош на дополнително брашно. Јас најдов малку бело и го користев него за сукањето. Може да се пече и така како круг, на добро загрејано суво тавче. За децата направив со малечко парче путер и намачкано сирење во средина на кругот, а краевите се завиткуват да се добие правоаголник, кој може да се истенчи уште малку со сукалката. Убаво е испечените банички да се чуват под капак, за да се меки.

Се печат брзо, но веќе на десетата баничка некако започнав да се осеќам мааалку зезната зашто наместо да се трупат банички под капакот, се трупаа празни танири кои чекаа да бидат наполнети.

Ќе заборавев колку чинеа.
Вкупно за околу 15 банички и 2 "палачинки" - околу 20 денари.

Домашно мусли според желбите

Факт е дека голем дел од детскиот вкус се влијае од телевизијата и рекламите. Средно пакет мусли од 1кг кошта 170 денари и внатре се во главно овесни или пшенични снегулки и минимална количина суво овошје. За помали деца тешко се џвака таа комбинација и мораме да додаваме корнфлејкс и "пуфки" (експандирани житарици). Ако сакате да го пробате рецептот на моите мали мажи, еве го предлогот: 

База-околу 130 денари.
 - 1 пакување корнфлејкс без шеќер (300гр)
 - 1 пакување мешавина  снегулки од 4 житарици (300гр)
 - 1 пакување мешавина експандирани 4 житарици (100гр)
До тука количината е огромна и се собира во кутија 25*25*15см и е доволна за 10-14 порции. За една голема порција се потребни 50-80 гр.
 - Јогурт, кисело млеко, свежо цеден сок или вода

Додатоци:
 - Сушено овошје - брусница, ситно исецкани кајсии, сливи, ананас - една полна супена лажица е доволна како количина за една порција, средна количина 20гр- цена 10 денари
 - Свежо овошје - јаболка, свежи кајсии, праски, јагоди според сезонот- 5 денари.
 - Интегрален сусам и ленено семе -тазе мелени, тиквени семки
 - Чиа - тоа е малку скапа намирница, препорачаната количина според етикетата е 35гр (2 ч.л.) и тоа се околу 45 денари. И пак јас би ставила една лажичка.
 - Јатки - ореви, бадеми, лешници - сурови - 5 денари.

И така: математиката за 1 голема порција домашно мусли со сушена брусница, една јаболка, ленено семе и сусам мелени, лажица чиа и мелени јатки, со јогурт:  околу 50 денари. Тоа е најскапата опција која спремивме, најголемиот син проба и одобри и е повеќе од доволно за возрасен кој не е на диета.
Во пати подобар појадок од четвртина бурек.

Доручек за школски деца

Многу пати мојот најголем син ми раскажува што јадат негови другари на голем одмор. И стварно се револтирам не на децата, а на родителите. На сите информации колку е важна исхраната на децата, родителите се тие кои се ДОЛЖНИ да ги формираат вкусовите на децата. Должни се не затоа што некој излегол на телевизија и кажал така, а затоа што огромниот дел од современите болести се резултат од несоодветна, а во некои случаи навистина лоша исхрана. Муабетот "ее, па ние истото сме го јаделе и ништо не ни е" воопшто не држи вода и не смее да биде оправдување за немарноста на родителите околу храната на децата.
Живееме до училиште на фреквентна улица и веднаш на другиот тротоар - голем супермаркет, неколку бурекџилници...познато ви е. Доаѓа голем одмор и сликата е следната: деца трчаат преку улица без да пазат на коли, возачи возаат без да пазат и да застануваат. За 5 минути децата се враќаат со бурек, затворена пица, кифла, кроасан и тоа што најмногу ме иритира - ќеси чипс, смоки, течности кои тешко можат да се наречат сок и уште потешко може да се најде нешто корисно во нив. Просечно тоа кошта 50 денари.

Што можеме да припремиме на децата кое е подобра домашна варијанта?

Пијалоци:

• Свежо цеден сок - со 3 средни портокали се добива околу 250-300мл, цената е околу 20 денари, време за припрема - 5 минути со полнење на пластично шише, фрлање на корките во канта и миење на цедилката. Шишето е добро да се дополни со вода, за да не биде концентриран сокот.
• Компот - ако сте од тие кои не прават зимница, тогаш можете да искористите сушено овошје, јаболки, круши, дуњи и да сварите на тивок огин голема количина компот. Може да се заслади со мед, кафен шеќер, стевиа. Овошјето може да се пасира и да се добие одличен нектар. 
• Вода - децата треба да пијат многу вода- литар и повеќе. Шише вода е многу подобро од секакви купени сокови полни со хемикалии (слободно одвојте 5 секунди во маркет за да сликате етикета на таков сок и 20 минути дома  наместо да дремете на Фејсбук, да прочитате што точно содржат соковите).

Храна:

• Сендвич - има многу можности. Домашен леб со дип од ореви (фино пасирани урда, ореви и малку кисело млеко), краставица и марула; намаз од урда со печени пиперки -многу повкусно и корисно од купените намази; путер со кашкавал и зеленчцуци; други домашно приготвени намази. Реално еден домашно приготвен сендвич би не коштал 10 денари и најмногу 10 минути за припрема.
• Палента - припремена од претходната вечер. До утро палентата ќе се стегне и може да се стави во кутија без да се распадне, со гарнир од стапчиња од моркови, краставици или друг зеленчук. Една порција од 200гр би коштала околу 10 денари. Со додадени зеленчуци-20. 
• Овошје - почистени јаболки, банана, сезонско овошје.
• Тиква варена на пареа, намачкана со мелени ореви и мед - околу 5-10 денари.
• Домашни банички со зеленчук или со урда.
• Домашни палачинки со џем или мед.

Се` е до нас - колку сакаме да се ангажираме и да инвестираме во здравјето на нашите деца, ако нашето здравје не ни е толку битно. Слушам многу оправдувања од родители дека навистина им е битна исхраната на децата, но немале време. 10-15 минути наутро е време кое еден родител може да одвои за своето дете. Тоа време не е потрошено време, одземено от нашата припрема за работниот ден, пиење кафе, доспивање до последен момент,... тоа е малку време инвестирано во иднината на нашите деца.
Дополнување:
Во Фејсбук коментиравме како децата си ја враќаат домашната храна и си купуват глупости. Да, ако имат пари со нив.И пред некој да ме нападне како така ќе си го пуштиш детето без пари, да прашам: кога детето има храна, вода, овошје, нешто благо во кутијата, за што му се пари? Ако одговорот е “Да, ама треба да има пари, ако треба да си купи нешто“, тогаш проблемот не е во детето, него во родителот.И ние кога ќе излеземе да прошетаме со пари во џев, не си купуваме нешто со идејата колку е корисно.Например печен сончоглед или кафе од машина. А ако некој вратил храна дома, негов проблем- не е бил гладен. Децата не се кој знае колку поразлични од нас.И на нив им се случува да не им се јаде наутро. Нема да им се случи ништо страшно ако еднаш пропуштат јадење зашто не им се јадело. Коментар од типот “ааа, ма како така, мора да се јаде, не може да не се јаде“- памтите каква беше нашата реакција на такви муабети кога ние бевме на возраста на нашите деца? :)